పాకిస్థాన్ లో ఘోరం... 14 ఏళ్ల బాలికకు 41 ఏళ్ల వ్యక్తితో బలవంత వివాహం

పాకిస్థాన్‌లో మైనారిటీ వర్గాలపై జరుగుతున్న దాడులకు అద్దం పడుతూ మరో దారుణ ఘటన వెలుగులోకి వచ్చింది. లాహోర్‌లో కేవలం 14 ఏళ్ల వయసున్న క్రిస్టియన్ బాలికను 41 ఏళ్ల వివాహిత ముస్లిం వ్యక్తి కిడ్నాప్ చేసి, బలవంతంగా ఇస్లాంలోకి మార్చి పెళ్లి చేసుకున్నాడు. బాధితురాలు మూర్ఛ వ్యాధి, మానసిక ఆరోగ్య సమస్యలతో బాధపడుతుండటంతో నిందితుడు ఆమె నిస్సహాయతను ఆసరాగా చేసుకున్నాడు.

వివరాల్లోకి వెళితే.. లాహోర్‌లోని గుల్‌బహార్ కాలనీకి చెందిన అబ్బాస్ మసీహ్ అనే కార్మికుడి కుమార్తె నిషా బీబీ (14) మే 12న పని నుంచి ఇంటికి తిరిగి రాలేదు. దీంతో ఆందోళన చెందిన కుటుంబ సభ్యులు పోలీసులకు ఫిర్యాదు చేశారు. నిషా పనిచేస్తున్న ఇంటి దగ్గరలోని సీసీటీవీ ఫుటేజ్‌ను పరిశీలించగా, ఆమె ఒక మధ్య వయస్కుడితో కలిసి వెళ్తున్నట్టు తేలింది.

ఆ ఫుటేజ్‌లోని వ్యక్తిని గుర్తించేందుకు ప్రయత్నించగా, అతను 41 ఏళ్ల అర్షద్ హబీబ్ అని, అతడికి అప్పటికే మూడు పెళ్లిళ్లు అయ్యాయని తెలిసింది. హబీబ్ భార్యే అతడిని ఫొటోలో గుర్తించడం గమనార్హం. నిషా అపహరణకు గురైన రోజు నుంచే హబీబ్ కూడా తన ఇద్దరు పిల్లలతో కలిసి కనిపించకుండా పోయాడు.

పోలీసులు హబీబ్‌కు సంబంధించిన పత్రాలను చూపించగా, నిషా ఫిబ్రవరి 15నే ఇస్లాం మతంలోకి మారి, మూడు రోజుల తర్వాత హబీబ్‌ను వివాహం చేసుకున్నట్టు అందులో ఉండటంతో బాధితురాలి కుటుంబం దిగ్భ్రాంతికి గురైంది. ఇవి నిందితుడిని రక్షించడానికి సృష్టించిన నకిలీ పత్రాలని వారు ఆరోపిస్తున్నారు.

ఈ కేసును వాదిస్తున్న న్యాయవాది జునారా ప్యాట్రిక్ మాట్లాడుతూ.. నిందితుడు హబీబ్‌ను రహీమ్ యార్ ఖాన్ జిల్లాలో గుర్తించినట్టు తెలిపారు. నిషా వయసు 18 అని, ఆమె స్వచ్ఛందంగా మతం మారి పెళ్లి చేసుకున్నట్టు నిందితుడు నకిలీ పత్రాలు సృష్టించాడని, చట్టం నుంచి తప్పించుకోవడానికే మతాన్ని వాడుకుంటున్నాడని ఆమె ఆరోపించారు. పాకిస్థాన్‌లో ఇలాంటి ఘటనలు తరచూ జరుగుతున్నాయని, గత నెలలోనూ 15 ఏళ్ల సిద్రా బీబీ అనే బాలికను ఇలాగే కిడ్నాప్ చేసి, మతం మార్చి పెళ్లి చేసుకున్నారని హక్కుల సంఘాలు ఆందోళన వ్యక్తం చేస్తున్నాయి.